An hril pei dan chun, siel hai hi intla an ni hlak leiin mihriem umna hmuna chauh naw khom ramhnuoia hai hlobet pet ding an zong hlak leiin voi tam tak an inhmang hlak leiin a neituhai ta dingin siel hai chu hriet karthlak a harsa pek hlak a nih, ti a hrilin, chips anthok hin a neituhai hriet suok a suk olsam pha hle ding thu an hril bawk.
Siel taksa a chieu lut ding microchip hi digit 15 ning a ta, olsam le na lo taka chieu lut a ni ding thu an hril bawk.
An chips inbuk ding hi techninal expert hai naw chun lak suok mei mei thei lo ding an leiin siel hai damsung an taksa-ah a um ding a nih. Hi lei hin siel neitu inchuna Mizoram-a um hlak chu olsam taka rel fel a ni thei ding thu an hril.
Mizoram sorkar chun State sunga siel an pung theina dingin tiin siel vaitu hai chawkpurna dingin hma a lak a, hi lei hin Mizoram-ah siel khom an pung tiel tiel ni ta’n ei thu lakna chun a hril bawk.
V&AH department director LB Sailo hrildan chun, kum 2007 le 2012 sung khan Mizoram-ah siel 1,344 zetin an pung niin a hril. Kum 2007 khan Mizoram-a siel um zat chu 1,939 a ni a; kum 2012 khan 3,283-in an pung ni a hril a nih.
