Mizoram-ah hnam dang (non-tribal) sumdawng phalna trade license 53 a um a, chuonghai chu permanent trade license 15 le temporary trade license 38 an nih. Hienglai zing hin, trade license neituhai chu an nau inthlasawng pei hai kuomah license inpeksawngna’n a huom thei chin-ah dan mumal a umnaw leiin iengchenam a huom ti a chieng nawh.
Trade license hai hi Mizo District Council hun laia pek suok vong an ni a, license inhlan sawng thei chin bithliena felfai a umnaw leiin home department chun ennon an tum thu an hril. Affidavit/power of attorney hmanga infetir el chu a felnaw a an ngai a nih.
Trade license nei hai hin an license an sukhring thar dingin document hrang hrang – ILP, tax an pekna registration photocopy, trade license photocopy, power of attorney/affidavit le a tira license neitu hming le an inlaichinna hai inṭhangsa tir a ngai a; Aizawl DC office-ah uluk takin enfie a ni hnungin home department tieng thon a ni a, home department chun dan angin license chu an sukhring pek nawk hlak a nih.
License inhlansawng chungchanga hin advocate Lalnunsanga chun, “License reng reng inhlansawng thei a ninaw a, driving license khom inpek sawng chi a ni naw a, ‘power of attorney’ hmanga trade license inhlan sawng hi an dik thei nawh,” tiin a hril.
Inner Line Permit (ILP) dan-in a tarlang dan chun, permanent trade license neituhai chu kum khat neka tam le kum hni neka sawt lo ILP an pek hlak a; permanent trade license neituhai chun an sungkuo hai le an hnuoia thok ding mi 3 neka tam lo an sponsor thei a nih. Temporary trade license neituhai chu kum khat sunga dingin ILP pek hlak an ni a, anni hin an sungkuo hai an sponsor thei bok a nih.
