Bairabi North YMA hai hmalakna chungchang-ah August 2 khan transport secretary rawiin Kolasib DC office-ah inṭhungkhawmna nei a ni a. Transport secretary chun, rel lampui sukzau ding an leiin October 2014 anthokin mega road block nei a ni ding le Bairabi-ah rel a lut thei naw ding ti hrilin, “Hi lei hin road block sunga Mizoram-in bufai harsatna a tong nawna dingin sorkar-in theitawp a suo a nih,” tiin a hril.
Hrangtawna chun, bufai tam tawk tak siekhawl a ngai a, hi ding hin rel a la tlan thei lai chun Bairabi-a rel lut le suok ding sukbuoi chi a ninaw thu hrilin, Bairabi YMA hai chu ngun taka inngaituo ding le Mizoram ta dinga harsatna siem lo dingin a ngen bok a nih.
Bairabi North YMA ṭhuoituhai chun, DC rawia ngaituo a ni laia hmasawnna a um naw leia rel suok ding sukhnu an ni thu an hril a, rel lut hun zan dar 10 le suok hun zing dar 4:30 hai chu Mizo mipui ta dingin sor ṭangkaina a umnaw a, kut sinthawtuhai khomin an thlai thar zorna kong-ah harsatna an tuok niin an hril bawk.
Hrangtawna chun, Badalpur-ah railways area manager a ni tah thu hrilin, rel tlan dan bithlie chu kum khat pei a ding a ni thu hrilin, rel tlan dan chu zan dar 8.25-ah Bairabi tlung a ta, zing dar 5:30-a suok nawk dinga ti a ni thu hrilin, rel tlan dan hmang lai chu pom ve hram hram dingin a ngen bok a nih.
Inrinni vek khan transport secretary hin Bairabi rel chawlhmun a sir nghal a, record hrang hrang hai a endik bok ni a hril a nih. Transport secretary hi Kolasib DC Jitender Yadav le home department-a joint secretary Lalbiakzuala haiin an ṭawiawm a nih.
