Minister Lal Thanzara chun, khehpuam chu Mizoram-ah a lut zing thu hrilin, "Doctor-in damnawhai an inchaw ngai si naw a, hienganga tam tak a hung lut zing hi ngaimaw a um hle a nih. Chuleiin, pseudoephedrine manna dan khauh lem a um theina dingin sorkar thlungpui-ah rotna intlun hi a ṭul a nih," tiin a hril.
Health minister chun, ND&PS Act judge Lucy Lalrinthari-in ND&PS Act hnuoi-ah pseudoephedrine chu ram danga thon suok amani, ram dang anthoka lak lut amani hai chu man thei a ninaw thu a hril thu a hril a. Hieng a ni leiin, khehpuam man theina Drugs & Cosmetics Act kenkawtuhai sukhrat dan ding an rel a nih.
Inṭhungkhawmna-ah hin, India rama khawpui lien hrang hrang – New Delhi, Kolkata, Guwahati, Bangalore le Mumbai-a Mizoram House-ah hai inchuklai le khuolzin invak chinchang hrietchieng taluo lo hai kut-ah khehpuam thon hlak a ni thu le fimkhur dinga hrilhrietna nei a ni tah thu hril a nih.
Zanita inṭhungkhawmnaa khan Mizoram chief secretary L. Tochhong, IGP Zorammawia, special judge Lucy Lalrinthari le Health department hotuhai an ṭhang a, tulai hnai hin drugs licence 310 suktawp a ni thu tarlang a nih.
