Bomb sukpuoktu man an ni hnung hin home minister R. Lalzirliana chun zani khan a in-ah thuthar lakhawmtuhai an pawlpui a, “Ram ralmuong taka mipuihai hlim taka kan um laia tuolthat hiel hreh loa hienganga thilthaw nuomtu, mi dawizep hai man an ni hi lawm a um tak zet a nih,” tiin a hril.
Home minister hrildanin, HPC-D ha’n Mizoram-a thutharbu pakhat-ah bomb hi an sukpuok anga an insal leiin nghor nawk zuolin police ha’n an sui a nih, tiin a hril.
Police hai chun August 2 zan khan Vairengte an pan a, zankhawvar-in an sui hnungin zani zing dar 5 vel khan Lalringthang an man a nih. Lalringthang hin Aizawl-ah ṭum 2 bomb a sukpuok thu police hai hma-ah an puong tah thu ei thu lakna chun a hril.
Lalringthang hin July 22, 2014-a Sinlung Hills Development Council (SHDC) chairman Hmingchunghnung in bula police gypsy-a bomb puok le August 1, 2014 zinga Mizoram parliamentary secretary ZS Zuala in bula bomb puok chu a thaw a ni thu a hril a, hmun danga bomb puok hai ruok chu a thaw a ni le ni naw police ha’n an indon fie mek ni a hril a nih.
Lalringthang-in police hmaa a hrildanin, HD Hmangaiha-in thaw dinga a hril angin ZS Zuala in bul-ah bomb hi a sukpuok a, gelatine 15 vel khitkhawmin, a puok nghal nawna dingin a fuse hmor-ah cigarette (Farstar) an buk a, bomb a puok chun Salem Veng-a a tlungna a unau hai in-ah a tlung hman tah niin a hril.
Lalringthang hi SHDC chairman Hmingchunghnung in bawlnaa inhlaw hlak a ni a, ZS Zuala hai in-ah khom poisa hni dingin a fe hlak ni a hril a nih.
Hieng a ni lei hin Lalrinthang hi a mi hrietchienghai bei dinga tir a ni an ring thu police hotuhai chun an hril.
Police hai chun, Lalringthang hi HPC(D)-a inhnamhnoina nei niin an hriet a, amiruokchu thu indonfiena hun an la nei tlawm leiin thu chieng an la hriet naw thu an hril.
HD Lalhmangaiha le HD Lalrinpuia hai chu August 2 zing kara man an ni a, anni khom hi thu indonfie mek an nih. Police hotuhai hrildanin, HD Hmangaiha hi Mizoram Hmar Welfare Committee-ah assistant secretary a ni a, HD Lalrinpuia hi tuta hma khan HPC(D)-ah a ṭhang hlak niin an hril.
Home minister R. Lalzirliana chun, “Bomb puok an suina-ah hin mi tu khom, an inhnamhnoi ti hrietchieng hai chu ieng mi khom nihai sien, man ngam naw nei nawng kan tih,” tiin a hril.
Home minister hi minister Zodintluanga, IGP Zorammawia, Aizawl SP C. Laldina le CID (SB) SP Rodingliana Chawngthu ha’n an ṭawiawm a nih.
