Mimkei-in NC Hills-a infepawna sukbuoi

Haflong, August 9, 2014: Zani hmasak khan ruosur NC Hills, Assam-ah ruo nasa takin a sur leiin Jatinga le Retzawl (Haglong-Silchar lampui) inkar le Dittokcherra le Bandarkar (Lumding-Badarpur Hills) inkar-ah mimkei a tlung leiin motor le rel lampui infepawna a suksiet a, hienglai hmuna hai hin mi tam tak an intang pha niin ei thu lakna’n a hril.

Haflong-Silchar lampui inkara mimkei hi Ningani August 7 zana tlung nisienkhom sinthawtu ding haiin zani chen khan infepawna hi an la siemṭha naw ni a hril a nih. Assam Rifles le Territorial Army sipai hai chun infepawna lampui inthielfai dingin an hmangruo hai leh hienglai hmuna hin an tlung tah ni a hril a ni bok.

NH(E)-54 lampui hi National Highways Authority of India (NHAI) hai enkolna hnuoia sie nisienkhom, NHAI chun construction company pakhat kuomah sin chu a dande sawng a nih. Mipui chun tu chen hin company hai hin infepawna hi an la siemṭha nawk naw niin an soisel.

Mimkei tlung zo sawtnawte hnung hin railways thuneituhai le restoration team hai chu a hmun-ah an fe nghala, beipui thlakin infepawna siemṭha dingin sin an thaw ṭan nghal a nih. Amiruokchu, zani zan chen khan an sinthaw chun darkar iemanizat a la aw dinga hril a nih.