UPSC-CSAT hmang sunzom ding

New Delhi, August 5, 2014: Union Public Service Commission (UPSC) examination pattern chungchanga buoina um mek chingfel a ni theina dingin India sorkar chun riruongna thar siemin, prelims exam Paper II-a 8-9 English comprehension question hai chu gradation le merit a dingin tiem an naw ding thu le CSAT format ruok chu hmang sunzom ning a ta, August 24-a prelims exam khom riruong dan angin nei ning a tih, tiin a hril.

Sorkar thutlukna hi minister of state (MoS) Jitendra Singh-in zani khan Lok Sabha inkhawmna-ah a puong a, CSAT hmang ṭan kum 2011-a civil service in exam ṭan hai ta dingin kum 2015-ah ṭum khat exam nawk thei dinga phal pek ni bok an tih, tiin a hril.

Singh chun, “UPSC exam-a Civil Services Aptitude Test (CSAT) chu hmang sunzom a ning a ta, amiruokchu hi taka mark hmu chu merit list-ah inṭhangtir ni nawng a tih. Hi hi hmang a ni chun English mark khom merit list-ah a ṭhang naw ding tina a nih,” tiin a hril.

English background nei lo inchuklai ha’n UPSC-in CSAT pattern a hmang hi soiselin, ṭong tienga inthlierna le inditsak bikna a’nlangtir a nih, tiin hun iemani chen anthok khan lungawinawna an inlangtir tah a, Parliament Inpui 2 a hai khom member ha’n thupui a put lutin rorelna sukbuoi khopin boruok an siem pha hiel bok a nih.

India sorkar eptu pawl hai chun sorkar thlungpui kuomah, UPSC exam pattern buoina chingfel dan pumhlum zong dingin an ngen a, minister of state for parliamentary affairs Prakash Javandekar chun sorkar-in sukfel vat a tum thu a hril.