Hmar Inpui rorelna pom naw thu puong

Hmarkhawlien, July 20, 2014: Liemtah July 16 khan Hmar Inpui (Jiribam-Barak Valley Region) le Hmar National Union (Assam le Block No. 6, Manipur) hai chun inṭhungkhawmna neiin thla hmasak June 26-a Hmar Inpui Exective Committee thurel an pom naw thu le an zui naw ding thu an rel.

Inṭhungkhawmna-a hin Hmar Inpui Exeutive Committee thurel an ngaitui zui nghal thu hrilin, “Nguntaka ngaitou le suizui a ni hnungin, thu hmangtlaklo, sirsanbo, umzie feltak nei phaklo-ah kan ngai a, kan pom naw a, zui naw bok kan tih,” tiin an huom sunga mipui hai hriet dingin an thusuok siemin an tarlang bok a nih.

Thla hmasak June 26 khan Hmar Inpui General Headquarters chun thusuok siemin, joint secretary-a dingin Ramsangthang (Pherzawl/ Rengkai) le Lalhmingthang (Tuisen/Jiribam) hai an ruot thu tarlang a ni a. Ramsangthang-in Tuiṭhaphai, Hmarram le Imphal Region hai enkai dinga ti niin, Lalhmingthang-in Vangai, Jiribam le Barak Valley Region hai a enkai thung dinga ti a nih.

Hmar Inpui thusuokin a tarlang pei danin, region zieklanga um hai hi thurel thar a um nawk hma po Hmar Inpui GHQ hnuoia khai hri dinga rel a ni thu insuo a ni bawk.