Zani khan NSCN-IM chun thusuok siemin, “India sorkar aiawtu Ajit Lal chun harsatna tam tak um sienkhom an inbiek sunzomna hin an kar-ah inhrietpawna ṭha a hring suok a beisei thu a hril a; NSCN-IM aiawtu general secretary Th. Muivah khomin hmatieng an fe sunzom pei a ṭul thu a hril bawk,” tiin a tarlang.
Thla hmasak June 10 khan NSCN-IM hotulien iemanizat hai chu India sorkar leh dan ang taka inbiekna nei sunzom nawk dingin Dimapur anthok New Delhi an pan kha a nih. Inbiekna sunzom nawk ding thu le inzoma March 9 anthoka Nagaland-a um tah, NSCN-IM chairman Isak Chisi Swu le Th. Muivah hai ruok chu May 13 khan Delhi an lo pan lawk ta bok a nih.
Nagaland-ah NSCN-IM hotulien pahni hai thla hni an um sungin Forum for Naga Reconciliation (FNR) thlazar hnuoi-ah Naga helpawl FGN/NNC le NSCN-Khole/Kitovi hai leh “Lenten Agreement” an ziek bok a nih.
Kum iemanizat liemtah a Naga National Government (NNG) siem dinga ziek tah chu hieng Naga helpawl hai hin March 28-a an inhmukhawmna a hin thu-in NNG siem dingin an inrem a nih.
