Special public prosecutor Dilip Sarkar-in tuolthatna thubuoi ngaithlakna-ah Sushil Choudhury hi mi 3 thatna thu-ah inrolna inthuk tak a nei leiin “capital punishment” pek dingin a nor a, “Thutharbu neitu le editor ni bok si, a hnuoia sinthaw 3 hai hi venghim nekin a that lem a nih,” tiin court-ah a hril.
Tuolthattua intum Choudhury chun, “Ka thiemnawna a um nawh, tu'nam an that ti ka hriet nawh. Ka kum upa'tna ngaituo-in mi ngaidam ro,” tiin mipui bit mup court-a chun a ngen.
Nisienkhom, West Tripura additional district and sessions (AD&S) court judge Kripankar Chakraborty chun, “Mi pathum hai hi i that ngei a ni sukchieng a ni tah,” ti a donin, “A thilsuol thaw hi khaihlumna thlak nisienkhom a kum ngaituo-in Sushil Choudhury hi IPC 120(B)/109 section 302 hnuoi-ah a thi chen, damsung lung in-a intang ding le Rs. 50,000 chawi dinga hrem a nih,” tiin thu a reltluk a nih.
May 19 khan “Danik Ganadoot” thutharbu a sinthawtu 3 hai chu office compound sung-ah that an ni lei khan State pumpui a nghong nasa hle a nih.
Investigation Officer (IO) Manas Paul-in nasa taka a sui hnungin, AD&S court kuomah a suina lekha, phek 562-a sa chu a pek lut a; Sushil Choudhury chu mi 3 hai tuolthattu-ah an tum a nih.
AD&S court chun kar hmasak July 14 khan tuolthatna thubuoi chu a ngaithlak zoin Sushil Choudhury hi thiemnaw a'n changtir ta a nih. Voisun khan a hremna ngaithlak a ni a; a damsung, a thi chenin lung in intang dinga rel a nih.
“Danik Ganadoot” a sinthawtu 3 hai that an ni hnung kar iemanizat liem hnungin Choudhury le a hnuoia sinthawtu ni bok, a thi laia ṭhang office driver Balaram Ghosh nuhmei Niyoti Ghosh (k. 35) hai chu inhnamhnoina an nei ni a ring leiin man an ni a; Niyoti Ghosh ruok chu thubuoi hrepuitu dinga pom niin thubuoi anthok insuoktir a nih.
Ei thu lakna’n a hrildanin, Niyoti Ghosh le a nau nuhmei kum 13 mi hai chun Balaram Ghosh sunhlum a ni lai an hmu niin a hril. Balaram Ghosh sungkuo hi thutharbu office building khata um an nih.
IO Manas Paul chun thuthar lakhawmtuhai kuomah, “Tuolthatna hi ram chungchang le nuhmei pasal inlaichinna thubuoi a ni a, hrepuitu mi 41 vel ko niin, suichieng a nih,” tiin a hril.
Tuolthattu Choudhury hin India prime minister le president iemanizat hai rambung danga an inzin chang a lo zui ta hlak a; chu an zinna hai chu lekhabu a ziekin a sutsuok ta nghe nghe bok a nih.
