NCHAC sum tienga buoina thu-ah inṭhungkhawm

Haflong, July 20, 2014: Liemtah Zirtawpni khan Assam chief minister Tarun Gogoi inrawina’n a office chamber-ah North Cachar Hills Autonomous Council (NCHAC) sinthawtuhai nuorna le sum tienga Council harsatna hriltlangna le ngaituona neiin Assam sorkar-a thuneituhai a'nṭhungkhawm.

NCHAC chief executive member (CEM) incharge Samuel Changsan chun, sum tienga NCHAC harsatna tuok mek sukfel dinga CM hmalakna chung-ah lawmthu a hril a; inṭhungkhawmna-a hin harsatna hai ngun taka ngaituo a ni thu hrilin, tu kum January thla anthoka NCHAC sinthawtuhai hlaw pek talo hai chu an hmatienga pek ngei dingin rel a ni thu a hril.

Inṭhungkhawmna-a hin Assam Minister for Hill Areas Development Khor Sing Engti, Assam-a autonomous council hai CEM pahni Debojeet Thaosen le Tuliram Ronghang, Bokajan MLA Klengdoon Engti hai khom an ṭhang bok a nih. Anni hai baka hin Assam sorkar hotulien additional chief secretaries HS Das, Bhaskar Mushahary le SC Das, principal secretary MGVK Bhanu, commissioner and secretary GD Tripathy, HAD commissioner le secretary, Border Areas commissioner le secretary, le NCHAC-a Principal Secretaries hai khom an ṭhang bok a nih.

Hi inṭhungkhawmna-a hin kum 1996-a inhrietthiemna thlungpui ziek anga SIU, border outpost le Excise, Transport, Sales Tax le Printing and Stationary hai po po inhlan sawng dan ding khom hriltlang a ni thu Samuel Changsan chun a hril.