Zanita CDH eastern block hong thar hi sawng hni In a ni a, sawng tin-ah room 16 a um a; ICU, treatment room, doctor room, x-ram, waiting room, le nuhmei le pasal ta ding observation room khom a um bok a nih.
Ibobi Singh hrildan chun, CDH-ah hin khum 120-130 vel sie mek a ni a, nitin district sung chauh naw khom State sung le puotieng le Burma anthok khomin out-patient 600-700 inkar vel a nei hlak leiin district-in Hills Medical College nei ve a phu hle a nih, tiin a hril.
Ibobi-in CDH block thar a hongna a hin health minister T. Phungzathang le commerce and industry minister Govindas Konthoujam hai khomin an ṭawiawm a; CDH old building, OPD, children OPD, warn building, female ortho ward, OT, block bank, maternity ward le children ward hai enfelna an nei bawk niin ei thu lakna chun a hril.
Block thar hongna huna Ibobi hrildan chun, CDH chu tu tak hin khum 100 anthok khum 300 hospital-a hlangkai el thei a ninaw thu hrilin, Manipur sorkar chun khum 200 hospital-a siem dingin hma a lak ding thu a hril. Medical Council of India (MCI) guidelines dungzui chun khum 200 chin nei hospital hai chun medical college an nei thei thu a hril bawk a nih.
Hi thu le inzom hin CDH medical superintendeny Dr. Shyamsunder Singh chun district hospital chu khum 300 um theina dinga hlangkai ding le medical college anga hmang a ni theina dingin lekha a lo thelut ta bok kha a nih.
Medical College chungthu-ah CM chun, Detailed Project Report (DPR) le Cabinet hai phalna a ṭul hmasa thu hrilin, district hospital chu medical hospital a hlangkai a ni theina dingin khum 100 hospital a ni bak chu iengkim-ah a tlin vong thu a hril. Khum 200 hospital-a siem theina dingin block thar hong ang tho a dang hong belsa thei a ni thu a hril bawk.
CM chun medical college indinna dingin Rs. 200 crore a ngai ding thu hrilin, sorkar thlungpui anthokin Rs. 180 crore le State sorkar anthokin Rs. 20 crore a bawl thei a ni ding thu a hril.
Ibobi chun, hun sawtnawte hnungin hospital-a ding Khengjang power sub-station anthok three-phase dedicated electric line pek a ni ding thu hrilin, electricity department haiin pre-paid meter an inbuk mek thu-ah mipuiin thlop seng dingin a ngen bok a nih.
