SHDC chairman in bawl bul-ah bomb puok

Aizawl, July 22, 2014: Voituk zingkar 2:30 vel khan Aizawl Bungkawn Vengthar-a Sinlung Hills Development Council (SHDC) chairman Hmingchunghnung in bawl lai mek bul hnaih lai hmelhrietlo haiin bomb an suok puok a, hi bomb hi Mizoram police officer Ryado Hlychho motor kawl lai Gypsy-ah sukpuok niin motor hmatienga engine hai a suksiet nasa hle a, mihriem thi le hliem ruok chu an umnaw a, a bul hnaia in le bang hai a suk koi nuol niin ei thu lakna chun a hril.

Bomb sukpuok ri hi a’n ring hle a, geletine bomb ni a ring a nih. Bomb puok hnung hin bomb puokna bul-ah mobile phone hmu a ni a, police hai chun bomb sukpuoktu hai suktlak ringin an lak nghal a; mobile phone hmang hin bomb sukpuoktu hai suisuok in beisei hman hle hai sienkhom police officer nauhai mobile phone motor-a an theinghil a ni lem thu ei thu lakna chun a hril.

Bomb sukpuok le inzom hin ringhlel man an la umnaw a, iengleia sukpuok am a na ti khom hriet a la ni hri nawh. Tu kum March thla khom khan SHDC chairman Hmingchunghnung in hluona bul-ah bomb sukpuok a lo ni ta bok a nih.

Voituk zingkar-a bomb sukpuok le tiemin tu kum kum chanve sungin Aizawl khawpui-ah bomb voi 5 zet suok puok a lo ni tah.

A voi khatna-ah, January 30 an dar 11 vel khan Aizawl Treasury Square Bazar, Mizoram Legislative Assembly House le Information & Public Relations Office inkar, hmeruo le thildan zorna hmun-ah bomb a puok a, hi bomb hi bomb hrat tak niin an lang a, thil a suksie nasa hle a, mihriem thil le hliem ruok chu an um nawh.

A voi hnina-ah, February 20 zanril dar 11:40 bawr vel khan Aizawl New Market building, bawngsa zorna floor bul step-ah bomb a puok a, hi bomb puok leia mihriem thi le hliem an um nawh.
A voi thumna-ah, March 22 zing dar 3:50 khan SHDC chairman Hmingchungnung a in hluo Bungkawn Vengthar-ah a khotkharpui bul step-ah bomb a puok a, mihriem thi le hliem an um nawh. Bomb puok hin thuomhnaw a suksiet nasa hle a, gelatine bomb ni dinga ring a nih.

A voilina-ah, April 18 zan dar 11:50 vel khan Chaltlang Mualveng-ah P&E-a thok R. Lalchhanhima le Dr. Ramfangzauva hai inkar step-ah bomb sukpuok a ni a, hi bomb puok hi an ring hle a, mihriem thi le hliem ruok chu an umnaw a nih.

Bomb sukpuok hai hi ni 18-30 inkar deu vong an na, zan dar 11-12 inkar-ah voi 3 a puok a, zingkar khawvar hma deuin voi 2 sukpuok a nih. Bomb hai hi SHDC chairman Hmingchunghnung in bul-ah voi 2 sukpuok a ni ta bok a nih. Bomb sukpuok a hai hin mihriem thi le hliem tu khom an la umnaw a, bomb sukpuoktu ni a ringhla le man tu chen hin an la umnaw bok a nih.