Aizawl-ah HSA free coaching class

Aizawl, August 10, 2014: Kar thar Zirtawpni August 14 anthok khin Hmar Students’ Association (HSA), Aizawl JHQ le Sinlung Hills JHQ hai chun Mizoram Public Service Commission (MPSC) hnuoia competitive exam-a Hmar nau Hmar ṭong hmang tam tak an inziek tlinga, an lut theina dingin tiin inchuklai Class 7 anthoka chungtieng hai ta dingin ‘free coaching class’ buotsai a tih.

Free coaching class hi Aizawl Sikulpuikawn Don Bosco School-a nei ning a ta, zantieng dar 5:30 anthok zan dar 7 chen nei hlak ning a tih. Coaching class hi thla 3 sung nei dinga ti a nih.

HSA Aizawl le Sinlung JHQ thusuok chun, Sinlung Hills le Aizawl biel sunga inchuklai le graduate HSA member hai chu fielin coaching class a hin ṭhang seng ding inhriettirna a siem.

Coaching class ṭhangna ding hin security deposit Rs. 500 sung a ngai a, materials fee-a dingin Rs. 200 pek a ngai bok a nih. Thil dang po chu free ning a ta, security deposit hi attendance 85% score phak hai kuomah chauh pek kir dinga ti a nih.

Inchuklai mi iemanizatin coaching class-a ṭhang ding hin an inzieklut ta niin chanchin ei dong a, la’n zieklut nuom hai ta ding khoma kot hong a la ni thu le August 12 chen-ah inzietlut thei a ni thu a huoihottu hai chun an hril.