Mizoram-a inchuklai le sawrkar sin zawng mek abiktakin Hmar nuahai ta dinga buotsai HSA Platinum Jubilee Free Coaching hawngna inkhawm hi Don Bosco School, Sikulpui Kawn, Aizawl-ah nei a ni a. School neitu Pi Lalneikim-in hunser hmangin inchuklai mi iemanizat bak-ah HSA ṭhuoituhai le mi dang dang an ṭhang.
HSA Platinum Jubilee Free Coaching hi Staff Selection Commission (SSC)-in Central sawrkar department hrang hranga sin hnawbitna (job recruitment) dinga competitive examination a buotsai hieng Combined Graduate Level (CGL), Combined Higher Secondary Level (CHSL), FCI, CPO/SI le a dang danghai thlurbik deua buotsai a ni a. Tuchena coaching la dinga inzieklut hi mi 12 an ni ta a, Registration hi thaw mek a ni bawk.
Free Coaching hawngna inkhawmna a thuhriltu Pu Rothanglien Khawbung (Gen. Secy., HSA GHQ) chun inchuklaihai le sin zawng mek hai ta dinga HSA-in Free Coaching a buotsai thei hi lawmum a ti thu a hril a. Mizoram-a Hmar nau inchuklai hai chu hmun danga an unauhai nekin inchukna tieng le sin neina kawng-ah an hnufuol thu hrilin, Coaching la dinga naupang inziekluthai chu theitawp suoa Central sawrkar le a dang dang-ah ṭhangna hmu ngei dinga hma la dingin an fui. "Central sawrkar-ah a tam thei ang tak Hmar nau ei lut hi a pawimaw takzet a nih," tiin a hril bawk. Free Coaching buotsaina dinga phal tak le a thlawna School inhmangtirtu Pu Lalremsang chung-ah lawmum a ti thu HSA Gen. Secy chun a hril bawk.
August ni 18 (Thawṭanni) anthawkin Class ṭan ning a ta, zantieng dar 5-7 sung nei ni hlak a tih. Faculty (Tutor) dingin mithiem tak tak le Central sawrkar-a thawk lai zing – 1. Mithlesh Kr. Jha, Audit Officer, IA&AD (CAG), 2. John Vanlalnghak, Auditor (CAG), 3. Laltuosang, DEO (CAG) le Kapremvel Pulamte, Auditor (CAG) hai níng an tih. In register nuomhai chun Free Coaching Co-ordinator Tv. Ngurrivung kuomah ngaiven thei zing a nih.
A Hmun: Don Bosco School, Sikulpui Kawn, Aizawl (Neitu Pu Lalremsang)
Class ṭan hun: 5 pm to 7 pm. (Mon-Fri)
Loading....