Assam ramri laia cheng Adivasi hnam mi 2 inrukhmang an ni leiin Thawleni khan Golaghat district huom sunga Chetigaon-a 155 CRPF battalion office kot-ah nuorna huoihot a ni a, mipui lungsen le CRPF hai chu innorin buoina a suok zui ta pei ni a hril a nih. Adivasi hai hin an mi le sa inrukhmangtu-ah Naga helpawl hai an intum a nih.
CRPF le nuornaa ṭhang hai innorna-ah hin silai hmetpuok a ni a, mi pakhat-in a thi pui bak-ah mi iemanizat an hliem bok a nih. Nuorna huoihotnaa thina tlung thu-ah Nagaland tienga mi hai chu poitawktu ni a ringhla an nih.
Thawleni chawhnung tieng khan Adivasi hai hin Nagaland ram tienga Ralan, Ronsuyan le Chandalashung ‘B’ khuo an bei niin SDO (Civil) P. Phuleshe Yepthomi chun a hril a, hi lei hin khuo mipui lungawinawhai chun beilet ve dingin an inthok suok ve niin a hril.
Golaghat district-a ramri khuo – Chetiagaon, Rumanbasti, Tenpur, Lachitgaon le Jadhajibasti-a Naga mipui chengna lungsen chun chengna in iemanizat an raw ni a hril a nih.
Assam CM Tarun Gohoi chun Nilaini August 13 khan parliamentary secretary Etuwa Munda le Additional DGP AP Raut hai chu buoina suokna hmun an sir a, thiltlung dan hrechieng dingin a ngen a, venghimna sin thaw dingin security force sie belsa a ni bok. State le State inkara ramri buoina suok a hin CRPF hai ang, neutral force chauh venghimna sin thaw dinga sie thei an nih.
All Adivasi Students Association of Assam (AASAA) chun Nilaini khan Golaghat district-ah an mi le sa inrukhmangna thu-ah lungawinawna inentirna neiin, nuorna an huoihot ta bok a nih.
Assam environment and forest minister Rockybul Hussain chun, Thawleni-a buoina suok-ah Naga mi, lungawinaw ha’n mi 4 an kaphliem ti Assembly House-ah a hril a, m I 1 chu damdawi in panpui a ni laiin a thi niin a hril.
Hussain chun Advasi mihai chengna in 70 chuong raw a ni tah ti hrilin, mi 5000 chuong an raltlan a, relief camp siem pek an ni thu a hril.
Home portfolio cheltu Hussain chun, State sorkar-in Assam ram humhimna dingin theitawp a suo ti a hril a, puotieng miha’n kan ram mi’n chu pek ngai nawng an tih, tiin a hril. Boruok dit umlo tak a tlung belsa nawna dingin Nagaland sorkar leh inbiekna an nei zing thu a hril a, home department thuneituhai chu buoi suokna hmun sir dingin inhriettir an ni thu a hril bok.
Assam-a eptu party – AGP, AIUDF, BPF le BJP ha’n buoina suokna hmun sira, ramri thubuoi chingfelna dinga all-party team tir an rot chu Assam assembly speaker Pranab Kumar Gogoi chun pomin, all-party team chu a ma’n an rawi ding thu a hril bok.
Chief Minister Gogoi chun, Golaghat district-a dan le thupek ngirhmun hi Union Home Minister kuomah an hriettir ta bok a, venghimna sin thaw dingin Central para-military force khom ngen belsa bok a ni thu a hril.
State pahni hai inkara buoina suok chungchang-ah Gogoi chun, Assam chief secretary Nitish Khosla chun Nagaland chief secretary biek a, boruok muongum a awm theina dingin hma la dingin a hril bok.
