Freshers’ Social Meet hi Bangagarh-a GMC Auditorium hmuna nei dinga ti a ni a, khuollien-a dingin North Eastern Council (NEC)-a director Sherry Lalṭhangzo, IES hmang ning a ta; khuolzaum-in Assam-a asst. inspector general of police David Neitham, APS hmang ni bok a tih.
Hun khatna-a hin hin Guwahati khawpuia Hmar inchuklai mi thar hai inhmelhrietuona hun nei ning a ta, Pastor Lalhmunsang-in ṭongṭai pekna nei a tih. Inchukna tienga hlawtling ṭha bik hai kuomah lawmpuina le chawimawni inhlan ni bok an tih. Hi huna hin Mr. & Miss Contest khom nei ning a tih.
Hun hnina-ah khuollien-in puonzar pharna nei a ta, platinum jubilee souvenir tlangzarna le thuhril tawi hrilna hun pek ni bok a tih. Organising committee-in khuollien le khuolzaum hai chawimawina nei an ta, HSA cultural troupe-in hnam lam inentirna nei bok an tih.
Mr. & Miss Freshers puongna nei a ni zo-ah, platinum jubilee lucky draw potna le puongna um a ta, organising committee secretary-in anthok lawmthu hrilna a nei zoin, hun kharna le ruoi inhlana Upa L. Infimate-in nei a tih.
Guwahati HSA Freshers’ Social Meet-cum-Platinum Jubilee lawmna a mipui fekhawm hai hla le rimawi a inawitu dingin hmun hrang hrang anthokin Hmar hlasak thiem fiel an ni a, anni baka hin tuolsung hlasak thiem le Platinum Jubilee Band-in hla sak bok an tih.
Guwahati puotienga anthoka hlasak thiem incha bik hai chu – Laltuoklien (Mizoram), Lalsanglien Zote (Manipur), Rosy Vanlalhlani (Mizoram) le Kim Pachawn Infimate (Delhi) hai an nih.
