MPCY-in Lalzirliana thuhril an donlet

Aizawl, August 14, 2014: Mizoram People’s Conference (MPC) ṭhalai hai chun thusuok siemin, bomb sukpuoktuhai man suok chungchanga Mizoram home minister R. Lalzirliana-in eptu pawl ha’n lawmna thu an hril naw nia a hril chu an dotlet a, “Thu tak belchieng dawl a hung inlang suok tak tak hun-ah lawm leia bienga mitthli tui luong rawn tak ding chu eptu pawl hai kan nih,” tiin an hril.

MPCY chun, Congress sorkar-in hun sawt tak Mizoram mipui a ṭhuoi tah a, an ching hai khom mipuiin an hriet tah, ti hrilin, “Congress sorkar-ah ringna le beiseina nei ngam a harsa tah a nih. Bomb sukpuoktuhai man suok tah ni a an inhril khom hi inman tehlem (fake arrest) a ni thei el dim ti ngaituona mi'n siem tir thei a nih,” tiin an hril bok.

MPC ṭhalai hai chun, Central YMA-in Chakma intiempui nei an tum chu an thlop thu le fetlangpui ngei hai sien tiin an ditpui thu an hril a, “Ram le hnam himna ding le ngirsuokna ding chun harsatna tam tak paltlang a ngai hlak. Ei ram le hnam, ei sakhuo a himna ding hin Mizoram mipui hai ei ṭhangruol a, buoina le harsatna tam tak ei hmasuon ngam a ngai a nih,” tiin an hril.