MNYF chun, Congress ṭhalai ha’n an pu hai an sanna’n MNF sorkar laia dan-le-dun hlawsam anga an hril hi an sorkar lai ngei hin thudik suisuok dingin an phut thu an hril.
Tulai hnaia mi pakhatin MNF sorkar lai, kum 2008 September 2-a Saipum khaw kawla IR lambun chungchanga a meizang hlaptu le tumtua Congress president Lal Thanhawla a ni thu a puong hai; kum 2008 veka Zoram Revolutionary Front (ZRF) hai MLA hai vau ding le an theina ta phot-ah buoina siem dinga Lal Thanhawla-in a hmang ni a intumna chungchang suichieng dinga eptu thalai pawl - UDF ṭhalai ha’n April 22, 2014-a Aizawl police station-ah FIR an thelut tah, tuta ministry-in a hupbet mek hai hi inrang taka bawzui a ni theina dingin sorkar-na an chellai ngei hin Congress ṭhalai hai hin hma la-in, MNF ministry laia dan-le-dun hlawsam an ti hi sukchiengna mipui kuoma chieng taka tarlang dingin an phut bok a nih.
MNYF chun, “Tuha’m an na mani office kota bomb sukpuok a, mipui sukralṭituhai kha, mipui hai hin an la theinghil naw ti hi Congress ṭhalai hai hin hre thar nawk raw seh. An pu ha’n an suklawm zo naw amani, kum 2012 August 10-a New Capital Complex, Khatla-ah bomb sukpuoktu khom kha Congress ṭhalai ṭhuoituhai an ninaw am a nih?” tiin zawna an siem bok.
"Congress party opposition-a an um laia an thilthaw ṭhanaw tak tak – sorkar hmangruo suosamna hai, revenue directorate kota bomb sukpuok hai, transformer bomb-na hai, nga dil tur a hrai hai ang hi ching ve dingin MNF ṭhalai hai mi ngai naw raw hai seh," tiin an hril bawk.
Hieng hai hi mikhuol party hai thaw ding awm tak chauh a ni a, keini ram neitu party ṭhalai hai chun thaw ve chi-ah kan ngai naw a nih, tiin MNF ṭhalai hai chun hril bawk.
“Congress sorkar-na hnuoia dan-le-dun kenkawna a sie taluo tah hi MNF ṭhalai chun runthlak kan ti tak zet a. An sorkar-na hnuoia khuo inraw pekna um hai, mipuihai thlamuongtu dinga ngai kan police ha’n hawphur taka sorkar thu pek a ni leia nunau an soisa hlak hai, tuta hmaa ei la hriet ngainaw ruihlo chi hrang hrang lo hluor ta hai, inrukhmangna tlung inzingna hai, bomb puok thawm hriet ding um tam taluo hai hi MNF ṭhalai chun rapthlak a ti a; dan le thupek kenkaw zo ngang lo-ah home minister hi kan ngai a, State ralmuong ti a ei hming a lo inthang mawina hai hi Congress sorkar hnuoi-ah sukhmelhem a ni mek hi MNF ṭhalai hai chun poi kan ti hle a nih,” tiin an hril.
