Aizawl, August 7, 2014: Sinlung Hills Autonomous District Demand Committee (SHADDC) chun, Pathienni August 3- a Mizoram home minister (HM) R. Lalzirliana-in ‘Press Interview’ a neinaa a thuhril ṭhenkhat chu hnam inpumkhatna suksie thei le chibing ang zawnga inlakhran tumna tieng a kawk leiin pawi an ti thu le hi chungchanga hin HM an dem thu chanchinbumi hai an hril.
SHADDC chairman Lalmalsawma Darngawn chun voisun sun dar 12 khan Aizawl Press Club-ah chanchinbumi hai inpawlpuiin August 4-a Mizoram nitin chanchinbu ‘The Aizawl Post’ in Sinlung Hills Development Council (SHDC) chungchanga Mizoram home minister R. Lalzirliana thuhril ṭhenkhat a tarlang chu hnam inpumkhatna suksie thei le chibing inlakhran tumna anga mawsietna/intumna (allegation) a ni leiin ṭha a ti naw thu a hril a. “Hnam inthuruolna le inpumkhatna dinga ‘Hmar’ ti chu Sinlung suok zo nauhai po po inṭawm tlang thei ding ‘SHDC’ ti a thlak a ni ta hnung khawma chibing inlakhran tumna anga a la ngai tlat chun ‘Hmar Hills Development Council’ ti law law raw seh,” tiin HM a sawisel.
Malsawma chun August 4-a ‘The Aizawl Post’-in “SHDC chairman tan quarters pek tum lo” ti thupui hmanga SHDC chungchanga HM thuhril ṭhenkhata tarlang dan a hrilna a chun HM hin, “Electoral roll hai siemṭhat a ni bakah, Council huom chin ding hai khawm rin a ni a. Sienkhawm Hmar People Conventionm (HPC)-in an huol (hauh) chin rama hin Hmar neka Ralte an tamlemna hmun a um leiin, Hmar nilo a ram sunga cheng ve hai rawn phawt ngai a tih,” tiin a hril a nih, a ti a. “Chuleiin hieng hi a ni si chun a hnuoia tarlang hai hi HM lak-ah kan phut ve tlat a nih,” tiin a hril.
SHADDC-in HM le Mizoram sawrkar lak-ah an thil phut a tarlang hai chu –
(1) Demand Area, Bairabi, Vairengte anthawka N.E. Khawdungsei chenin Hmar neka Ralte an tam lemna chauh rawn loin Ralte neka Hmar an tam lemna khawm rawn ve raw seh.
(2) Hnam inlungruolna le inpumkhatna ding ‘Hmar’ ti chu thlakin Sinlung suok zo nauhai po po inṭawm tlang thei ‘Sinlung’ ti a kan thlak ta hnung khawma, a chibing anga inlak chauh tum le feeling nei anga HM-in a ngai tlat chun ‘Hmar Hills Development Council’ ti law law raw seh.
(3) Mizoram Sawrkar le HPC inremna hi July 27, 1994-a Lal Thanhawla keihruoi Congress sawrkarin an sign a ni leiin an sawrkar sung ngei hin MoS-a inziek angin a sukpuitling ngei ding a nih.
(4) Mizoram sawrkar le HPC inremna ang chun “Ramri chu Hmar majority-na chinah rin ni’ng a tih” ti a ni a. Hmar majority-na chin enfie ding hin 3-members Commission ruot a ni a. Chuonghai chu H. Raltawna, Thanghranga le Lalthanmawia hai an nih. Anni hin Bairabi anthawka N.E. Khawdungsei chenin khawtin-ah fe-in an endik a, Demand Area sunga hin hnam dang po po belkhawm nek khawmin Hmar chu an tam lem dei a nih ti hmu chiengin Finding Report khawm sawrkar-ah an pek lut thlap a nih. Hieng an mi tirhai thil hmu hi pawmin boundary chu sukfel el sienla, vawisun hin iengkhawm hril buoi ding um ta naw nih.
A hril peina-ah Malsawma chun, Mizoram sawrkar chu a thutiem-ah a ringum naw a nih, tiin a hril a, “July 27, 1994 anthawka vawisun chen kum 20 a liem hnung khawma MoS an ziek khum ngei khawm sukpuitling nuom loa an umna hin Mizoram sawrkar mizie a tarlangin a muolpho thlak tak zet a nih,” tiin a hril. Chulleiin, Mizoram sawrkar (Congress) hi HPC le an inremna chungchang-ah an ringumna nekin an ringumnawna hmu ding a tam lem a nih, tiin Malsawma chun a hril bawk.
“Vawisuna kan hril nuomtak chu HM thuhril a hin hnam anga inlakhranna, insukbingna le feeling nei rana ram ṭhuoituha’n an ram sung an enkawl chun anni ngeiin buoina la chawksuok an ta, harsatna insiem mei mei an tih ti inlau a uma, ngaituona mawl tak nei loa ṭawng fimkhur dingin kan ditsak takzet a nih,” tiin SHADDC chairman chun chanchinbumi hai a hril.
“SHDC huom sunga hnam hrang hrang chenghai hin SHDC Area chu Sixth Schedule a hlangkai a ni hi lungruoltakin kan pawma. Abiktakin Area sunga Ralte hai lem chu kan Headquarters ṭhuoitu lien lien-ah an um lem a nih. Chuleiin HM thil uksak hi uksak thlaka kan ngainaw a, a ṭhatna nekin a ṭhatnawna tam lem ngei a tih. Keini chun SHDC Area sunga chenghai po po dam tlangna ding le himna dinga kan ti a ni si a. Chuleiin, Sinlung suok Zo nau inti hai ta ding chun SHDC Area chu ei renga thlamuong taka ei chengna ding a ni lem,” tiin a hril bawk.
Lalmalsawma Darngawn hi SHADDC general secretary Khamzalam Gangte-in a ṭawiawm a nih.
SHADDC hi July 18, 2012-a indin niin, SHDC chu Autonomous Council a hlangkai a ni theina dingin Indian Prime Minister Manmohan Singh kuomah October 29, 2013 khan memorandum a lo peklut tah bawk a nih. Hi baka hin Mizoram chief minister Lal Thanhawla le Mizoram governor Purushuthoman hai kuomah memorandum khom November 30, 2012 le October 17, 2013 khan a lo peklut ta bawk a nih.
SHADDC-a nina chel mek hai chu:
Chairman: Lalmalsawma Darngawn (Ramhlun South, Aizawl)
V.Chairman: Lalrinsanga Ralte (Saipum)
Gen. Secy: Khamzalam Gangte (Saipum)
Fin. Secy: D. Hmangaiha (Sakawrdai)
Treasurer: Ruolneikhum (Vaitin)
Secretaries: Lalremlien (Saipum), Hrangneikhum (Saiphai), Lalhratthang (Zemabawk) le Lalbieksang Varte (Chaltlang)
Committee Members: Thangchuong (Sakawrdai), Upa Lalruotthang (Saipum), Upa Thangvung (Vairengte), Lalkhuma (Suangpuilawn), Lallianzula (Khawlek), Lalsiemkim (Khawlian) le Ngurhrangkima (Phuaibuang)
