Parliamentary affairs minister M. Venkaiah Naidu chun Parliament-ah, “Tu kuma dingin exam hun son ni nawng a tih,” tiin a hril a; hienglai zing hin UPSC exam pattern buoina chingfel vat dinga sorkar phutin eptu pawlhai chun risietna siem nawkin, all-party meeting huoihot vat dingin sorkar an phut bok a nih.
Minister Naidu chun, session zo hnung-ah UPSC buoina chingfel dan ding ngaituo-in party le stakeholder hrang hrang hai sorkar-in a’n pawlpui ding thu hrilin, “UPSC buoina hi uluk taka inchuk chienga, hriltlang a ngai a nih,” tiin a hril.
Eptu member haiin August 24 hma ngeia all-party meeting huoihot an phutna chu sangin, minister of state for parliamentary affairs Prakash Javadekar chun, UPSC buoina chu olsam taka chingfel el thei a ninaw thu a hril a, “Ngaidan hrang hrang le zau lem la khawm dingin all-party meeting buotsai ngei ning a ta, inṭhungkhawmna hun ding ruok chu nakie tieng inhriettir ning a tih,” tiin a hril.
Exam beituha’n kum 2011 anthoka ṭan, UPSC exam pattern thar - Civil Services Aptitude Tests (CSATs) ditnaw leia lungawinawna an inentir hnungin sorkar chun buoina chingfelna dingin riruongna thar siemin, English mark chu merit list-ah inṭhangtir lo dingin a ti a nih.
