Development of North Eastern Region (DoNER) minister VK Singh chun hi thu hi tulai hnai khan Lok Sabha-ah a hril a; Pakyong (Sikkim), Itanagar (Arunachal) le Chiethu (Nagaland)-a hai airport 3 hai hi hong an tum thu a hril.
Airport 3 hong belsa ding hai laia hin Pakyong airport chu Airport Authority of India (AAI)-in a siemna sin chu a thaw mek ti a hril a, kum 2016 December khin hong hman beisei a ni thu a hril.
“AAI chun Itanagar airport master planning a sukfel tah a, Detail Project Report buoipui mek a ni a, Steering Committee-in a enchieng mek a nih,” tiin a hril.
DoNER minister chun, Chiethu airport chungchang-ah State khawpui Kohima ta dinga remchangna ding hmun ngaituo dingin Nagaland sorkar chu inhriettir a ni hnung-ah a hmun ding chu hmu a ni tah thu a hril a, a chinchang enchieng mek a nih, tiin a hril.
Singh chun, India hmarsak-ah airport hmang lo 12 a um thu hrilin, hieng hai laia 8 chu siemṭhat a ni ding thu a hril bok.
Vuongna hmanga India hmarsak infepawna sukchangtlungna dingin AAI chun infrastructure hmasawnna sin, airport iemanizat-ah a thaw mek ti Singh chun hrilin, thaw hmabak iemanizat a la um thu a hril bok.
“Vuongna hmanga infepawna-ah Guwahati chu India ram State dang hai le infepawna hmunpuia siem tum a ni a; Agartala, Dibrugarh le Imphal hai khom hmarsaka infepawna hmunpui-ah siem tum a ni bok. Hi ding hin vuongna siena hmun runway sukzau, passenger ha’n vuongna sunga an lutna hmun le terminal building hai khom siemṭhat dinga riruongna siem a nih,” tiin a hril.
Singh chun, hmarsak biel-ah hmasawnna project tam tak fepui mek a ni thu hrilin, DPR thelut inhnuk a ni lei dam, clearance lak konga harsatna leiin project suk inhnu hlak a nih, tiin a hril bok.
